Tónlistarhátíðinni Kótelettunni lauk undir morgun á Selfossi þegar ein skærasta poppstjarna landsins Patr!k „PBT“ Atlason sló botninn í hátíðina. Það rigndi nánast stanlaust á hátíðargesti í alla nótt sem létu það enn aftur ekkert á sig fá.
Uppselt var á hátíðina alla helgina og mikill ágangur frá fólki sem ekki hafði tryggt sér miða að komast á hátíðina. Baksviðs var því fleygt að líklega væri Kótelettan því orðin fyrsta vatnshelda tónlistarhátíðin á Íslandi því það rigning truflaði hvorki gesti, listafólkið eða skipulagið.
Einvalalið tónlistarfólks fór á kostum
Poppdrottningin Birgitta Haukdal fór gjörsamlega á kostum með hljómsveitinni sinni Írafár en þau stigu á svið um miðnætti. Þá ætlaði gjörsamlega allt um koll að keyra þegar hin íkoníski Love Guru steig á svið með eldspúandi dönsurum og söng „1, 2 Selfoss“ sjálfskipaðan þjóðsöng hátíðarinnar.
Söngkonan Klara Einars opnaði kvöldið og eftir henni komu Nussum. En kvöldið var allt saman risa tónlistarveisla þar sem fram komu Emmsjé Gauti, FM95Blö, Hubba Bubba, 12:00 sem var leyniatriði kvöldsins og vöktu mikla gleði, Stuðlabandið ásamt Diljá og svo rappstjarnan Daniil. Svo lokaði Patr!k dagskránni eins og áður kom fram en söngkonan Gugusar kom fram með honum í einum lagi.
Grillað fyrir góðan málsstað
Grillhátíðin og fjölskyldu dagskráin í Sigtúnsgarðinum yfir miðjan daginn í gær tókst líka afskaplega vel. Grillað var til styrktar Styrktarfélagi krabbameinssjúkra barna en hátíðin er einn stærsti stuðningsaðili félagsins á Íslandi.
Myndirnar hér fyrir neðan tók Mummi Lú fyrir Kótelettuna.
