Laugardaginn 15. maí klukkan 15 mun gítarleikarinn gímaldin flytja verkið Jessica Joneses own Ringtone Reggae Theme Song í Gamla sláturhúsinu á Fagurhólsmýri.
Verkið er fimmti og nýjasti hlutinn í seríal verkinu Kinly Related Metal-Reggaes, sem er í grunninn gítarsinfóníettur sem mætast á nokkrum sameiginlegum sviðum, eins og metal, elektró og reggae. Innri merking verkanna hverfist gjarna um persónur sem hafa haft áhrif á höfundinn, bæði raunverulega(r) og óraunverulega(r), þarámeðal; sænska lögreglukonu, danskan lögreglumann, fóstra og vinnukollega.
Verkið er búið í myndræna umgjörð sem er í senn gjörningur og sýning, og hönnuð af Evu Bjarnadóttur, listamanni og sýningarstjóra í Vinnustofunni – Gamla sláturhúsinu.
Eftir sýninguna, klukkan 16, verður boðið upp á gönguferð með Sigrúnu Sigurgeirsdóttur fyrir neðan Hamrana á Fagurhólsmýri.
Viðburðurinn er fyrir alla aldurshópa og boðið verður upp á léttar veitingar. Pakkatilboð er á ferð og gistingu í tvær nætur í Öræfunum í samstarfi við Strætó BS og Hótel Skaftafell. Frekari upplýsingar og bókanir á evabjarna@hotmail.com.
Dagskráin er fyrsti hluti í sýningarröð sumarsins á Fagurhólsmýri, Þrístökki. Síðar í sumar bregða listatvíeykið Tara og Silla á leik og að lokum Halldór Ásgeirsson myndlistarmaður og Helen María Björnsdóttir ljósmyndari.
