Nemendur Grunnskólans í Hveragerði eru enn á ný á meðal vinningshafa í ensku smásagnakeppninni, sem Félag enskukennara á Íslandi (FEKÍ) stendur fyrir.
Frá þessu er greint á vef skólans en þessi ánægjulegu tíðindi bárust um ganga hans í morgun.
Skemmst er frá því að segja að nemendur á miðstigi hlutu hvorki meira né minna en öll sex verðlaunin sem í boði eru og einn nemandi hlaut verðlaun á elsta stigi. Skólinn á því sjö vinningshafa af níu í flokki grunnskóla nemenda sem er magnaður árangur og virkilega gleðilegur.
„Við erum að springa úr stolti og þökkum öllum nemendum kærlega fyrir þátttökuna og óskum vinningshöfunum innilega til hamingju,“ segir í tilkynningu frá enskukennurunum, þeim Genimar Adriana Aranguren Lopez og Ólafi Jósefssyni.
Í flokknum 5. bekkur og yngri unnu eftirtaldir nemendur til verðlauna:
Magdalena Sigurjónsdóttir í 5. AÞJ fyrir söguna The Fake Dog.
Matthildur Sara Ágústsdóttir í 5. AÞJ fyrir söguna The Fake Life.
Emilía Guðbjörg Hofland Tryggvadóttir í 5. AJK fyrir söguna Alien In a Human’s World.
Í flokknum 6.–7. bekkur unnu eftirtaldir nemendur til verðlauna:
Baltasar Björn Sindrason í 6. LH fyrir söguna The Stolen Sweets.
Snædís Freyja Stefánsdóttir í 7. ILH fyrir söguna Mizuki Cat.
Heiðdís Lílja Sindradóttir 6. í GH fyrir söguna Brave.
Í flokknum 8.–10. bekkur vann Bryndís Klara Árnadóttir í 10. MÍ til verðlauna fyrir söguna Allan.
Keppnin er haldin í tilefni af evrópska tungumáladeginum þann 26. september og taka nemendur í 5.-10. bekkí GÍH þátt á hverju ári. Smásögurnar verða að vera skrifaðar á ensku og tengjast ákveðnu þema sem að þessu sinna var orðið “FAKE”.
Verðlaunin verða afhent í Veröld – húsi Vigdísar þann 17. febrúar næstkomandi.