Í ljósi núgildandi sóttvarnarreglna, sem gilda til og með 27. ágúst næstkomandi hefur verið ákveðið að aflýsa Kjötsúpuhátíðinni á Hvolsvelli, sem átti að fara fram 27.-29. ágúst.
Í tilkynningu frá menningarnefnd segir að þetta sé mjög miður enda hafi undirbúningur gengið vel hingað til. Öllum þeim sem ætluðu að koma að hátíðinni, hvort sem er að undirbúningi eða sem hluti af dagskrá, er þakkað fyrir en stefnt er að Kjötsúpuhátíð að ári dagana 26.-28. ágúst.
„Það er mikilvægt að hver og einn hugi að sínum sóttvörnum og virði þær reglur sem almannavarnir setja hverju sinni. Áfram þurfum við að vera á verði gagnvart farsóttinni og ekki ráðlegt við þessar aðstæður að blása til mikilla hátíðahalda. Verið er að kanna möguleika á að vera með tónleika í streymi á laugardagskvöldið en það er þá auglýst síðar,“ segir meðal annars í tilkynningu menningarnefndar Rangárþings eystra.