Myndlistarnemar Fjölbrautaskóla Suðurlands halda uppteknum hætti að setja upp sýningu í opinberu sýningarrými utan skólans. Að þessu sinni eru það aðallega nemendur í módeláfanga á þriðja þrepi og einn til sem sýna í Listagjánni á Bókasafni Árborgar.
Sýningin opnar þann 20. janúar og í henni fá nemendur í framhaldsáföngum þjálfun í uppsetningu og kynningu á eigin verkum.
Verkin á sýningunni eru unnin á haustönn 2021. Þau eru unnin út frá skissum af lifandi módeli. Valdar skissur eru síðan unnar áfram í blýant, grafík, leir, vatnsliti og fjölbreytta blandaða tækni og lokaverkefni sem er unnið með akrýl á striga.
Fjölbreytt listnám í FSu
Það er margt à seiði á listalínu FSu og áhugi nemenda mikill. Boðið er upp á fjölbreytt úrval áfanga sem opnir eru öllum nemendum burtséð frà því hvort þeir eru á brautinni eður ei. Það er alltaf gefandi og gaman fyrir kennsluna að fá eldra fólk með áhuga á skapandi greinum inn í hinn hefðbundna nemendahóp.
Meðal hins mikla úrvals af skapandi áföngum sem boðið er upp á í FSu ásamt myndlist má nefna stafræna smiðju, Fablab, kvikmyndun, leiklist, textíl hönnun, grafíska hönnun og grafíska miðlun. Veggjalistin færir út kvíarnar og á vorönninni verður veggurinn vallar megin málaður. Það verður spennandi að sjá hvað nemendum dettur í hug að láta birtast þar í vor.
Sýningin í Listagjánni verður opin til 20. febrúar.
