Í kvöld er boðað til Njálumóts í Þórbergssetri í Suðursveit. Einnig verður formleg opnun á nýrri sýningu, Fjallasýn, sem er samstarfsverkefni Skriðuklausturs og Þórbergsseturs.
Fjallasýn er málverkasýning þar sem sýndar eru myndir af þremur fjöllum, Snæfelli, Herðubreið og Öræfajökli. Einnig er leitað til skálda og náttúrufræðinga og varpað ljósi á breytta sýn til fjallanna í gegnum aldanna rás.
Á Njálumótinu ætla þeir Njáluaðdáendurnir Bjarni E. Sigurðsson á Torfastöðum og Fjölnir Torfason frá Hala að leiða saman hesta sína og fjalla um Njálu svo og tengingar Skaftfellinga við Njálu.
Bjarni hefur í farteskinu myndir listakonunnar Þórhildar Jónsdóttur, frá Lambey, en hún hefur teiknað myndir af helstu sögupersónum Njálu. Þar birtast í fyrsta skipti myndir sem eiga að sýna persónuleika og ímynd þessarra þekktu persóna í sögu og bókmenntum íslensku þjóðarinnar og er það án efa mjög forvitnilegt. Bjarni hefur verið með erindi um Njálu víða að undanförnu og hafa myndirnar vakið umræður og eftirtekt.
Njálumót er liður í því að gera hlut fornbókmennta stærri í heimi nútímamanna svo og í menningarferðaþjónustu á Íslandi. Það er því ekki úr vegi að taka upp á ný Njáluumræður á Hala og halda umræðunum af baðstofuloftinu áfram, þar sem ,,Njáll var vitur en samt heimskur að láta brenna sig inni, Skarphéðinn fimur og mikill kappi en ósvífinn, Kári stórkostlega snjall, Hallgerður óþokki, Gunnar óskiljanlega heimskur að snúa aftur og Flosi svalur en góður í raun,” svo vitnað sé lauslega í Suðursveitarbækur Þórbergs.
Allir eru velkomnir á Njálumót hvaðanæva af landinu, hægt er að fá gistingu og allan viðurgjörning í Suðursveit. Formleg dagskrá er aðeins á föstudagskvöld en heimamenn á Hala eru tilbúnir að leiðsegja fólki um safnið og umhverfið yfir helgina.