Leikdeild Ungmennafélags Gnúpverja frumsýnir gamanleikinn góðkunna Sex í sveit í félagsheimilinu Árnesi annað kvöld, föstudaginn 28. febrúar kl. 20:00.
Verkið, sem er eftir Marc Camoletti í íslenskri þýðingu og staðfæringu Gísla Rúnars Jónssonar, er bráðskemmtilegur farsi sem gerist í íslenskum sumarbústað þar sem óvæntar uppákomur, flækjur og misskilningur valda ótal vandræðalegum – og hlægilegum – aðstæðum.
Leikararnir eru sex talsins og geta þeir vart beðið með að stíga á svið og tryggja áhorfendum kvöld fullt af hlátri og góðri stemmningu. Leikstjóri verksins er Björk Jakobsdóttir. Hún hefur leikstýrt fjölmörgum sýningum fyrir bæði börn og fullorðna og lagt sérstaka áherslu á að skapa líflega og kraftmikla sýningu sem höfðar til breiðs hóps áhorfenda. Með Björk við stýrið er tryggt að hláturinn verður aldrei langt undan.
Sýningin er styrkt af Uppbyggingarsjóði Suðurlands. Gnúpverjar hvetja alla til að láta sjá sig í Árnesi til að kitla hláturtaugarnar í góðum félagsskap og sprúðlandi stemningu.