Í gær sendi hljómsveitin Hr. Eydís frá sér jólalagið Þegar eru að koma jól. Lagið var heimsfrumflutt í miðbæ Selfoss í gærkvöldi, þegar kveikt var á jólaljósunum í bænum og voru undirtektirnar magnaðar.
Erna Hrönn syngur lagið með Hr. Eydís en bæði lag og texti er eftir Örlyg Smára, söngvara og gítarleikara hljómsveitarinnar. Hr. Eydís og Erna Hrönn hafa starfað saman í rúmt ár og haldið merkjum ´80s á lofti með ábreiðum sínum bæði á YouTube og tónleikunum Alvöru ´80s partý.
„Mig langaði að gera eins jólalegt lag og mögulegt væri, en eins og margir vita eru flest vinsælustu jólalögin ítölsk lög með íslenskum jólatexta. Ég brá því á það ráð að söngla bull ítölsku þegar ég samdi lagið og viti menn ég held það hafi virkað. Þegar lagið var klárt gerði ég íslenskan texta í stað bull ítölskunnar og jólin voru komin í lagið,“ segir Örlygur Smári léttur og bætir við að „…menn beita ýmsum brögðum til að koma sér í rétta gírinn þegar samin eru lög. Ítalska útgáfan er til, kannski að ég leyfi fólki að heyra hana við gott tækifæri.“