Dagana 11.-13. október mun Stockholms Manskör halda þrenna tónleika hér á landi í samstarfi við Karlakórinn Fóstbræður, Karlakór Keflavíkur og Karlakór Selfoss.
Tónleikar Stockholms Manskör og Karlakórs Selfoss verða í Skálholtskirkju, sunnudaginn 13. október kl. 16.
Það mikill fengur fyrir íslensk tónlistarlíf og þá sérstaklega unnendur karlakóratónlistar að fá Stockholms Manskör undir stjórn hins þekkta stjórnanda Håkan Sund í heimsókn til Íslands. Kórinn sem stofnaður var laust eftir síðustu aldamót hefur á að skipa úrvals söngvurum sem margir hverjir sungu áður með hinum heimsþekkta kór Orphei Drängar.
Á efnisskrá tónleika Stockholms Manskör kennir ýmissa grasa þar sem skandinavísk kórtónlist skipar stóran sess með verkum eftir m.a. Edvard Grieg, Hugo Alfven og Jean Sibelius svo dæmi séu tekin. Auk þess eru á efnisskránni verk eftir franska höfunda eins og Camille Saint-Saëns, Darius Milhaud og Francis Poulenc.
Eins má geta einstakra laga eins og Bridge over Troubled Water eftir þá félaga Simon og Garfunkel auk ABBA lagsins Mamma Mia og fleiri laga. Síðast nefndu lögin eru útsett af stjórnanda kórsins, Håkan Sund, en hann þykir einn fjölhæfasti tónlistamaður Svíþjóðar á sínu sviði.
Það er ljóst að tónleikar Stockholms Manskör er viðburður sem unnendur karlakóratónlistar ættu ekki að láta framhjá sér fara.
Tónleikarnir kóranna eru eftirfarandi:
Föstudaginn 11. október kl. 20 syngur kórinn ásamt Karlakór Keflavíkur í Ytri-Njarðvíkurkirkju.
Laugardaginn 12. október kl. 17 syngur kórinn ásamt Karlakórnum Fóstbræður í Langholtskirkju
Sunnudaginn 13. október kl. 16 syngur kórinn ásamt Karlakór Selfoss í Skálholtskirkju.