Þrjár sýningar opna í Listasafni Árnesinga í Hveragerði laugardaginn 8. febrúar klukkan 15:00.
Í sal 1-2-3 opnar sýningin Meðal guða og manna: Íslenskir listamenn í Varanasi en þar sýna þau Einar Falur Ingólfsson, Eygló Harðardóttir, Guðjón Ketilsson, Margrét H. Blöndal, Sigurður Árni Sigurðsson og Sólveig Aðalsteinsdóttir. Sýningarstjóri er Pari Stave.
Á sýningunni gefst innsýn í reynslu sex mótaðra og margreyndra íslenskra listamanna en verkin sem eru sýnd urðu til í tengslum við dvöl þeirra nýverið í gestavinnustofum Kriti Gallery og Anandvan Residency í Varanasi á Indlandi, sannkallaður griðastaður í sögufrægri borg með einhverja lengstu samfelldu búsetu manna. Varanasi (sem einnig er þekkt sem Banaras), er andlega miðstöð sem meðal hindúa er þekkt sem „bústaður guðanna“, með ótölulegum fjölda hofa og altara sem helguð eru ákafri tilbeiðslu. Varanasi er borg öfga og fjölskrúðgs mannlífs en jafnframt alvörugefinnar sorgar við líkbrennslurnar á tröppunum við hið helga Gangesfljót.
Íslensku listamennirnir sem héldu til Varanasi fetuðu í fótspor fjölmargra annarra listamanna sem hafa farið þangað í leit að áhrifum og upplifunum. Samt var tilgangurinn ekki að myndskreyta eða túlka það sem þau rákust á; þess í stað var ætlunin að leyfa því áreiti á skynfærin, sem óneitanlega á sér stað í ferð til Indlands, flæða um taugakerfið og heilann, og sjá hvaða áhrif það myndi hafa á sköpunarverk þeirra.
Afrakstur vinnustaðadvalar á Bæ
Í sal 4 opnar sýningin Bær. Þar gefur að líta verk alþjóðlegra listamanna sem komu saman árið 2022 í vinnustaðadvöl á Listasetrinu Bæ á Höfðaströnd í Skagafirði. Listamennirnir eru þau Barbara Ellmann, Jóna Þorvaldsdóttir, Mike Vos, Katia Klose, Debbie Westergaard Tuepah og Markus Baenziger. Sýningin er eins konar áframhaldandi könnun á þessari upprunalegu vinnustaðadvöl þeirra frá árinu 2022, þar sem varanleg tengsl og ný áhrif mynduðust í verkum hvers og eins listamanns.
Hvað tengir saman sex ólíka listamenn, af ólíkum uppruna, sem koma saman í vinnustaðadvöl í sveit í Skagafirði? Það er augljóst að íslenska náttúran hafði mikil áhrif á þau. Hvernig getur þessi reynsla endurómað í listferli þeirra þegar þau snúa aftur í hversdagsleika sinn? Sýningarstjóri er Daría Sól Andrews.
Í vídeóhorni safnsins er einnig að finna vídeóverk eftir 11 indverska listamenn sýningarstjórar eru Bharati Kapadia og Anuj Daga.