Myndlistarkonan Víbekka Sól Andradóttir sýnir um þessar mundir í Skyrgerðinni í Hveragerði.
Víbekka málar með acryl á striga, spegla og tekur stundum gömul málverk sem eru ónýt og málar yfir og tengir stundum myndina við þá mynd sem var á bakvið. Þetta er fimmta myndlistarsýningin sem Víbekka heldur.
Opið hús verður á sunnudag í Skyrgerðinni þar sem Víbekka verður sjálf á staðnum á milli klukkan 14-17. Kaffi og gos í boði Víbekku og tilboð á veitingum hjá Skyrgerðinni.
Víbekka stundaði meðal annars nám hjá Myndlistarskóla Reykjavíkur og Menntaskólanum við Hamrahlíð. Hún hefur einnig brennandi áhuga á leiklist og var að ljúka námi í kvikmyndatækni hjá Rafmennt og Stúdíó Sýrlandi.
Sýningin stendur fram í miðjan október.
Á Instagram-síðu Víbekku má sjá fleiri verk eftir hana.
