Hljómsveitin Moskvít sendir frá sér nýtt lag í dag. Það nefnist Woman og er búið að vera lengi á leiðinni, að sögn Sigurjóns Arndal Erlingssonar, sem samdi bæði lag og texta.
„Þetta er síðasta lagið sem Valgarður Uni Arnarsson gítarleikari spilaði með okkur og gerði það snilldarlega,“ segir Sigurjón Arndal Erlingsson, söngvari hljómsveitarinnar. „Dansinn á milli Jóns Arons píanóleikara og Valla sólógítarleikara er galdur sem var svo gaman að fá að upplifa. Alexander Örn Ingason kann sko sannarlega að lesa lögin vel og skapar alltaf skemmtilegt andrúmsloft. Hann kemur mér alltaf jafn mikið á óvart með sínum trommuleik,“ segir Sigurjón, sem sjálfur fer á kostum í laginu í bassaleik og söng.
Sigurjón segir að það sé smá saga á bakvið textann. „Ég var kominn með fyrsta erindið og línu í brú sem fer svona: „this old coffee table made out of mapel with cigarette burns, dragged around it’s surface.“ Fyrir sunnudagssteikina hitti ég pabba og var að tala við hann um daginn og veginn eftir að hafa sýnt honum það sem komið var í laginu. Umræðurnar smituðust auðvitað af textanum sem kominn var og ég fer að tala um hvað lífið breytist með tímanum og sumt virðast eldast með manni og fær annað hlutverk. Pabbi segir við mig „Ég er búinn að vera með mömmu þinni síðan ég var 16 ára… ég get alveg sagt þér það að augun eldast með manni.“